МЕНАМ ВОКӦЙ «КОСМОСЫН»
Витя Кановлӧн кык вок: Петя да Ӧльӧксей. Ӧтиыс армияын служитӧ. Лётчик. Воліс кольӧм во гортас отпускӧ да, мыйта Витя любуйтчис. Петя югыд кӧзырока картуза. Китель вылас погонъяс. Морӧсас медаль да орден.
Лётчик вокныс Витялы да Ӧльӧксейлы вайис быд пӧлӧс гӧснечьяс, ворсанторъяс. Медся донаыс на пиысь самолёт. Бергӧдлан сійӧс ключӧн и заводитас жургыны, сэсся торйӧдчас места вывсьыс да кутас кытшлавны-лэбавны. Эк, завидьтісны жӧ сэки другъясыс Витялы. Ӧнӧдз, колӧкӧ, ворсіс сійӧ вокыс пӧдаркиӧн, да ичӧтик Ӧльӧксей жугӧдіс. Куим арӧс на сылы, а лёктортӧ вӧчны тырмӧма выныс. Не мамыс кӧ, ёна эськӧ нӧйтіс пакӧститчысьӧс. Ӧні на лӧгыс петӧ ичӧт вокыс вылӧ.
Тайӧ ӧмӧй сӧмын... Витялы гожӧмбыд ковмис пукавны вокыс дорын. Бать-мамыс мунасны удж вылӧ, а сійӧс колясны рытӧдзыс Ӧльӧксейкӧд. Ёртъясыс купайтчӧны, чери кыйӧны, вотчыны вӧрӧ ветлывлӧны, а Витя лун-лун гортас. Рытнас нин гуляйтны петыштлас. Олӧм ӧмӧй тайӧ!
Тӧрыт мамыс локтіс удж вылысь да радпырысь юӧртіс:
— Витюк, аски сэсся воктӧ садйӧ нуам, тэныд позяс и шойччыштны.
Выль костюм кӧ бать-мамыс ньӧбисны детинкалы, гашкӧ, омӧльджыка радліс. Окота вӧлі дзик пыр котӧртны другъяс дінас да висьтавны, мый юӧртіс мамыс. Но кытчӧ мунан, кор дас час рыт нин. Татшӧм сёрнас мамыс некор на эз волывлы.
Аскинас Ӧльӧксейӧс мамыс пасьтӧдіс выль костюмӧн, сэсся мӧдӧдчисны детскӧй садйӧ. Мамыс аскӧдыс нуӧдіс и Витяӧс, медым петкӧдлыны, кӧні кутас овны: гашкӧ, коркӧ и колльӧдны ковмас. Витялы кӧть и эз вӧв окота шлёпиктыны мамыс бӧрся, да быть лоӧ кывзысьны.
Садйӧдзыс вӧлӧмкӧ абу и ылын. Витя унаысь нин ветлывліс тайӧ кык судта керка дортіыс.
— Но, Лёшенька, тані и кутан овны. Эн бӧрд, сэні ӧд зэв гажа. А рытнас гортӧ бӧр мунам, — окыштіс мамыс Ӧльӧксейлысь еджыд плешсӧ да пыртӧдіс керкаӧ.
«Детскӧй сад «Космос», — лыддис стенсьыс Витя и сэн жӧ нюмъёвтіс. Сылы рад вӧлі, мый вокыс кутас овны садйын, кодлӧн нимыс «Космос». Дум вылас усьліны космонавтъяс: Гагарин, Титов, Николаев, Терешкова, Леонов да мукӧд, кодъяс йылысь не этша нин кывліс сюсь детина.
Кор мамыс петіс садйысь, Витя некӧн эз тыдав. А детина сэк кості тӧвзис нин гортас. Посводзысь кватитіс вугыр шатин, зептас сюйис нидзув банка и сыысь на ӧдйӧ котӧртіс чери кыйны, Сьӧд ты вылӧ.
Котӧртӧ Витя шыльыд моски кузя, трусика, майкаа. Вугыр шатиннас муртса оз зургы ветлысь-мунысьяслы. Паныдасис мамыскӧд ӧтилаын уджалыськӧд.
— Анна Гавриловна, вокӧй менам «Космосын»! Ура!
Гавриловна юр вылӧ быттьӧ уси пудъя из, первойсӧ шай-паймуніс, сэсся кыз сойяснас кучкис бокъясас.
— Збыль? Петяыд? Вот радлуныд, вот радлуныд! Сулавлы... Тӧлкӧн висьтав. Витя-а!
Но детинкалы дзик некор манитчыныс. Ёртъясыс, кӧнкӧ, юква тыр чери нин кыйисны, шонді петтӧдзыс на мунӧмаӧсь вуграсьны.
Пристаньӧ воигӧн паныдасис орчча керкаын олысь Анисья бабкӧд. Сійӧ, тыдалӧ, нылыс ордӧ теплоходӧн ветлӧма.
— Анисья баб, вокӧй менам «Космосын»! Аддзан, кутшӧм ме рад.
Анисья баб кӧть пельнас вӧлі сьӧкыд, татшӧм юӧртӧ кылӧма майбыр, кисьыс муртса эз уськӧд нопсӧ, чукырӧсь чужӧмыс быдсӧн веськалыштіс. Вель дыр кывсӧ шуны эз вермы. Да и юаліс кӧ мыйкӧ, Витя эз нин и кыв. Сійӧ чеччаліс пристаньӧ лэччан пос кузя, тэрмасис теплоход вылӧ, коді вот-вот вӧрзяс дебаркадер дорысь.
...А ӧні вӧтчылам Витя мам бӧрся. Со сійӧ тэрмасьӧ удж вылӧ. Сьӧлӧм вылас радлун: ичӧтик пиыс инасис местаӧ, ӧні оз ков сы вӧсна шогсьыны, ас кадӧ вердасны-юкталасны, водтӧдасны узьны.
Пырис уджаланінас да чуймис. Матӧ дас морт кытшалӧмаӧсь радиорепродуктор, ставӧн мыйкӧ виччысьӧны. Казялісны Витялысь мамсӧ, быдӧн заводитісны кутлыны, окавны. Нывбаба шӧйӧвоши, оз гӧгӧрво, мыйла сылы татшӧм чесьтыс, а контораын уджалысьяс кыв оз лэдзны шуны.
— Радӧсь, вывті радӧсь, Лидия Ефимовна. Татшӧм пиӧс быдтін, став мир пасьта нимыс сылӧн лоӧ тӧдса.
— Качайтны сійӧс! — горӧдіс кодкӧ.
Гашкӧ, эськӧ и качайтісны, да Лидия Ефимовна кыкнан кинас удитіс кутчысьны шкап вугйӧ.
Бухгалтер Анна Гавриловна мыччис сылы дзоридз чукӧр, мичаысь-мича, синъястӧ ёрӧны. Сэсся ён кияснас сідз кутыштіс нывбабаӧс, мӧдыс ойӧстіс быдсӧн. Колӧкӧ, дыр на кутлісны шӧйӧвошӧм Лидия Ефимовнаӧс, да шыасис радио. Сёрнитіс Москва. Бара ставӧн кытшалісны репродуктор, лои чӧв.
«Сетам сиктса йӧзлы передача», — кыліс радио пыр мужичӧй гӧлӧс, и мыйлакӧ ставӧн ышловзисны, сэсся сюся кутісны видзӧдны Витя мам вылӧ.
— Тайӧ збыль, мый тэнад пиыд космосӧ кыпӧдчӧма? Петр Яковлевичыд?..
Ӧні нин Лидия Ефимовна дзикӧдз воштіс кывъяссӧ, радысла тайкӧ синваыс брызьнитас-петас.
— Менам Петяӧй? Кытысь нӧ кывлід? Мыйла ме немтор ог тӧд? И ачыс немтор эз юӧрт, — медбӧрын тай петісны жӧ кывъясыс.
— Кытысь кывлім, шуан? Час джын сайын Витяыд меным висьталіс. Сэтшӧм рад, котӧртӧ кытчӧкӧ. Вокӧй пӧ космосын. «Ура» весиг горӧдіс.
Вӧлисти ставыс лои гӧгӧрвоана Лидия Ефимовналы. Сійӧ сэтшӧм сьӧлӧмсянь серӧктіс, мый орчча комнатаын пукалысьяс котӧрӧн локтісны. А нывбаба нюклясьӧ да сералӧ.
— Но и Витька, но и гормӧг... Сідзкӧ, сійӧ ставсӧ дзугис. Ой, кула серамӧйла. Ичӧтик Ӧльӧксеюшкоӧс талун садйӧ нуим, коді тай «Космосӧн» шусьӧ. Вот, кӧнкӧ, и ошйысис.
Та бӧрын серавны мӧдісны нин ставӧн, сӧмын ӧтнасӧн чӧв оліс бухгалтер, коді первойӧн вайис татчӧ юӧрсӧ. Сійӧс пӧсь, весиг, шыбитіс. Яндзим и теш.
— Сідзкӧ, пиыд садйын? Ми зэв радӧсь, — шыасис экономист, и бара мӧдісны радуйтчыны, чолӧмавны нывбабаӧс, ӧні нин быдӧн радлісны Ӧльӧксей да сылӧн мам вӧсна.
Витялӧн ошйысьӧмыс тайӧн эз на помась. Лидия Ефимовна локтіс гортас ӧбедайтны, а кильчӧ дорын сійӧс виччысьӧ нин сьӧкыд пеля Анисья баб.
— Тайӧ нӧ збыль, бобӧӧй, мый лётчик пиыд геройство вӧчӧма. Витя тай асывнас висьталіс да эг гӧгӧрво бура, локті юасьны.
Ковмис висьтавны, кыдзи мый вӧлі. Баб думсьыс лӧгасис Витя вылӧ. «Часлы, волас гортад, ме сійӧс видышта на. Ме нин мыйта ошки ыджыд питӧ, збыльысь ӧд вериті Витялы».
А Витя пукаліс гӧгрӧс ты дорын да аслас ёртъясыскӧд кыскаліс сэтысь гӧрд синъяса кельчиясӧс, мича паськӧмъяса ёкышъясӧс. Сійӧ вӧлі долыд и шуда. Да и мыйысь шогсьыны-майшасьны. Детина ӧд некодӧс эз пӧръяв. Сылӧн ичӧт вокыс талун и збыльысь «Космосын». Быдмас Ӧльӧксеюшко да, колӧкӧ, тшӧтш лоӧ космонавтӧн.
