ЛЭПТА НАЙӦС


Кымӧр сайӧдз кыпалӧны крежъяс,
Сывъяснад он сывъёвт видз ни му.
Миян крайын мортлӧн шуд надежнӧй,
Син водзад оз ӧшав пемыд ру.

Аддза ме янтарнӧй шобді море,
Помтӧм зарни идралӧ сэсь морт.
Коді мулысь озырмӧдіс морӧс?
Миян дона партия, народ.

Дзоридзалӧ яблоня лым цветӧн,
Вайӧ сійӧ шонді рӧма плод.
Коді сылы чӧскыд соксӧ сетіс?
Миян дона партия, народ.

Сэтӧні и тан лӧз паськыд юӧн
Киссьӧ сталь и кыпалӧ завод.
Тӧлысь вылын вымпел. Коді лэптіс?
Миян дона партия, народ.

Кыпыдӧс ми сьыланкывъяс тэчам,
Му пасьтаыс шевкйӧ налӧн борд.
Коді сэтшӧм вынсӧ налы сетіс?
Миян дона партия, народ.

И ме найӧс лэпта медся вылӧ,
Некор налы ошкан кыв оз быр.
Налӧн ыджыд сямлунӧн да вынӧн
Муным лоис ён, кыдз багатыр!

1962 во.