ЛЫШКЫД ЯГ


Сыктывкарса олысьяс пиысь ӧдвакӧ сюрас сэтшӧм морт, коді эськӧ эз тӧд тайӧ местасӧ. Сылӧн нимыс Белӧй бор, комиӧн кӧ, — Еджыд яг.

Гожся да арся лунъясӧ теплоход быд лун вайӧ татчӧ уна дас мортӧс. Коркӧ важӧнджык тайӧ ягас радейтлісны волывлыны ӧключина пыжъясӧн миян пӧльяс, батьяс, гырысьджык чой-вок.

Теплоходъяс ӧні дженьдӧдісны ветлысь-мунысьяслысь туйсӧ. Оз нин ков сынӧмӧн пыжъясӧн лэччыны да катны. Муртса коляс часысь дырджык, кыдзи воан сэтчӧ, Еджыд ягас.

Тайӧ ягыс и збыльысь еджыд. Лыддьыны кӧ, кымын тысяча морт талявлӧ гожся да арся пӧраӧ сылысь небыд ялаӧн вевттьысьӧм мышсӧ, любуйтчӧны мича эрдъяснас, шочиника быдмысь веськыд пожӧмъяснас, коръя пуяснас, — счётнӧй машина ковмас артавнысӧ.

Тані быд гожӧм шыалӧны и челядь гӧлӧсъяс, кодъяс волывлӧны шойччыны пионерскӧй лагерӧ. И спортсменъяс тайӧ местасӧ радейтӧны.

Оз овлы сэтшӧм гожӧм либӧ ар, медым тэ, Еджыд яг, кодӧскӧ примитін кӧдзыда, вӧтлін ас дінсьыд. Мӧдарӧ, быдӧнӧс тэ мӧдӧдан сьӧкыд кӧрзинаӧн да пестерӧн, козьналан татчӧ волысьяслы меддона тшак да вотӧс. Шойччысьясӧс юкталан чӧскыд сынӧдӧн да коран нимкодясьны аслад мичлунӧн, кодӧс кужӧма сетны тэныд природаыс уна нэм сайын на.

Радейтам ми тэнӧ кыдзи рӧднӧй гортнымӧс. И кыдзи он радейт, кор тэ миянӧс пыр примитан бур другъясӧс моз, быд пӧрйӧ мыйкӧ да мыйкӧ мӧдӧдан гӧстинеч гортъясаным бӧрсӧ мунігӧн: тшак либӧ вотӧс, мича дзоридзьяс, ассьыд вунӧдны позьтӧм чӧскыд кӧртӧ.

Ӧтитор кӧсъя: медым тэ дорысь мунігӧн бур йӧзыс, кодъясӧс вердан, шойччӧдан быд во, тшӧкыдджыка чӧвтлісны тэныд копыр.

Ещӧ окота содтыны ассянь: медым тайӧ гажа ягсӧ Сыктывкарса олысьяс, миян челядь да внукъяс радейтісны да донъялісны сэтшӧм жӧ пӧся, кыдзи сійӧс радейтлісны важӧнджыкся олысьяс, кодъяс абуӧсь нин, да ӧнія йӧз.

И нимтӧ колӧ вежны. Еджыд яг пыдди ыдждӧдлыны тэнӧ Лышкыд ягӧн. Татшӧм нимыс быд боксянь лӧсялӧ тэныд.


Гижӧд
Лышкыд яг
Ӧшмӧс: 

lkejrlkelkrgner klrjnelknfrkl ekjnrjkenfrej

1