КӦРТ ТУЙ ДОРЫН


Ме сӧмын сувті, сувті кӧрт туй дорӧ,
Сталь рельсъяслӧн кон нюжалӧ кык визь,
Став Коми мулысь вундіг паськыд морӧс
Да вӧняліг Тиманскӧй джуджыд из,

И аддза ме ог ӧтнассӧ куш сійӧс
Да кыдз сэт ветлӧ вына паровоз, —
Став пармаысь ме аддза югыд бияс —
Лӧз енэжыслысь югдӧдӧны свод.

Величественнӧ сувтӧны син водзӧ
Мен гырысь комбинатъяс, каръяс — выль.
И край, код мича дзирыд асывводзӧн,
Мен висьталӧ: став мойд тан лоис збыль.

Сьӧд пармасӧ, кӧн ыджыдавліс вой,
Тадз вежис, мичмӧдіс сӧветскӧй строй.

1947 во.