ДРУГЪЯС

Ӧбедайтігӧн Филипп некыдз эз вермы пукавны ӧти местаын. Бергаліс, жӧдзис, быттьӧ ёсь шылаӧн чуткалісны бокас. Быд паньыштӧм бӧрын чошкӧдліс пельсӧ, видзӧдлывліс ӧшинь улас.

Кор мамыс вайис кухняысь чӧдъя кисель, Филипп курччавтӧгыс ньылыштіс котлеттор, кӧсйис пышйыны пызан сайысь, но кыліс стрӧг гӧлӧс.

— Пукав, кисель сета.

Сійӧ видзӧдліс лӧз тасьті вылӧ, унаысь нюлыштіс вом дорсӧ, нӧ сёйны эз кут. Поліс ӧтиторйысь: другъясыс мунасны чери кутавны, колясны ӧтнассӧ.

— Менам кисельсьыд кынӧмӧй висьӧ, — тэрыба нурбыльтіс Филипп да ӧдйӧ вешйис пызан дорысь.

— Висьтав пу йылысь тури. Гашкӧ, и юрыд тшӧтш висьӧ? — шуасис мамыс.

Эз на удит Филипп корсьны картузсӧ, мамыс восьтіс сундук да мыччис сылы выль дӧрӧм, кодӧс вурис тӧрыт рытнас.

— На пасьтав, а то шыш кодь ветлан. Йӧзыс дивитасны.

Коді нӧ ӧткажитчас выль дӧрӧмысь? Филипп пасьталіс, видзӧдліс зеркалӧ пыр и радысла муртса эз горӧд. Сэтшӧм лӧсьыда пукаліс сы вылын выль ситеч дӧрӧм.

Ӧти здук мысти Филипп тӧвзис нин другъяс дінас. Шырӧм юра Лёша да тури кодь вӧсни кокъяса Коля дыр видзӧдісны Филипп вылӧ. Лёша — любуйтчис, Коля — завидьтіс.

— Сӧмын эн пондӧй кинад, лякӧсьтад, — ӧлӧдіс другъяссӧ Филипп.

Детинаяс панласигтырйи котӧртісны ю дорӧ. Гажаа дзольгис-визувтіс векньыдик ю. Ваыс вӧлі сӧдз, шоныд. Детинаяс пӧрччисны дӧрӧмъяснысӧ, пырисны ваӧ.

Посньыдик черияс тэрыба чепӧсйылісны детинаяс кок улысь, дзебсялісны изъяс сайӧ, колодаяс улӧ. Чери куталысьяс кань моз кыйӧдчисны, польтікасисны ва пытшкын.

Регыд найӧ аддзисны пань кузя сьӧд налимӧс. Кутшӧм окота лои сійӧс кутны. Сӧмын тай он босьт. Пӧсявтӧдзыс нин вӧтлысисны куим друг визув чери бӧрся, а кутны некыдз оз вермыны. Коркӧ не коркӧ налимӧс удайтчис жӧ йӧршитны гӧгрӧс вутш улӧ.

— Ӧні он пышйы, — радліс Филипп да кияссӧ надзӧникӧн вайис черилань.

Колялӧн дрӧгнитіс сьӧлӧмыс. Сійӧ повзис, мый налимыс сюрӧ Филипплы, а оз сылы. Уськӧдчис котӧрӧн вутш дінӧ. Кватитіс юрӧдыс чериӧс, кӧсйис нин шыбитны берегӧ, но нильӧг налим песовтчис, уси кисьыс.

— Кутӧй! Пышъяс! — горзісны детинаяс и вӧтчисны чери бӧрся.

Лёша кӧсйис паныдавны мудер налимӧс, но крукасис кытчӧкӧ, чорыда уси пидзӧс вылас. Синъясыс пемдылісны. Доймӧмысла горӧдіс.

Филипп отсаліс чеччыны другыслы. Петкӧдіс сійӧс веж луг вылӧ. Лёшалӧн пидзӧссьыс визувтіс вир.

— Ой-ой-ой... Доймӧ! — синвасӧ ньылаліс Лёша.

Вирыс кутіс визувтны ёнджыка. Филипп да Коля сулалісны юрнысӧ ӧшӧдӧмӧн, быттьӧ найӧ вӧліны мыжаӧсь Лёша доймӧмысь.

— Кӧртавны колӧ, — гӧгӧр видзӧдліс Филипп.

А мыйӧн кӧртавны, кор турунысь кындзи нинӧм абу.

— Кӧрталӧй, — кевмысис Лёша.

— Коля, тэнад дӧрӧмыд важ нин, вай сійӧн кӧрталам, — шыасис Филипп.

Коляӧс быттьӧ швачкӧбтісны плетьӧн. Сійӧ кыкнан кинас кватитіс дӧрӧмсӧ, топӧдіс морӧс бердас.

— Он сет? — выльысь юаліс Филипп.

— Мудер тай... Аслад дӧрӧмӧн кӧртав.

Лёша пыр на бӧрдіс да полігтырйи видзӧдіс вирӧсь кокыс вылӧ. Филипп ветлӧдліс ӧтарӧ-мӧдарӧ, думайтіс ыджыд дум. Сэсся курччис пар дорсӧ, лэптіс пу бокысь дӧрӧмсӧ и дыр видзӧдіс.

Жаль вӧлі косявны выль ситеч дӧрӧм. Поліс мамсьыс; видчыны сійӧ кутас, колӧкӧ, тасмаӧн нӧйтас. Но аслас медбур другыс вӧлі ещӧ на жальджык.

— Мамӧ-ӧс ко-рӧй! — ёнджыка бӧрддзис Лёша.

Коля кӧсйис нин котӧртны Лёша мам дінӧ, но кыліс: бӧрвылас мыйкӧ чажмуні. Бергӧдчис и синъясыслы оз верит. Филипп пиньяссӧ гурчкӧмӧн косяліс дӧрӧмсӧ и заводитіс кӧртавны Лёшалысь пидзӧссӧ.