ГАЛЯЛӦН БЫДТАС

Галялы бура тӧдса колхознӧй фермаӧ туйыс. Сійӧ пӧшти быд лун волывлӧ сэтчӧ, отсасьӧ мамыслы дӧзьӧритны куканьясӧс. А куканьясыд дурны да котравны радейтӧны. Он кӧ видзӧд на бӧрся, пыр и разӧдчасны кытчӧсюрӧ — корсь сэсся найӧс.

Вӧлі гожся лун. Эз на удит Галя лэччыны фермаӧ, кыдзи виччысьтӧг керкаӧ пырис мамыс. Чужӧмыс шӧйӧвошӧма, синъясыс гажтӧмӧсь.

— Ой, Галюш, Милочкаыд висьмис, оз сёй ни ю. Кулас кӧ и...

Галялы пыр жӧ дум вылас уси сьӧд кымӧсас еджыд паса, вӧсни кокъяса раминик кукань.

— И ветфельдшерыд абу, курортӧ муніс. Вӧлі кӧ сійӧ, дерт, отсаліс, — ышлолалӧ мамыс.

Галя мамыс моз жӧ шогӧ уси.

— Мамук, ме ӧні жӧ лэчча фермаӧ да лунтыр кута пукавны Милочка дорын. И турун сылы вая, медся чӧскыд бобӧнянь чукӧрта. Сійӧ ӧд бобӧняньтӧ зэв ёна радейтӧ.

— Ме, сідзкӧ, мукӧд куканьяссӧ нуӧда йирсьыны, а то тшыгӧсь, баксӧны коньӧръяс, — долыдмис мамыс.

Галя босьтіс вель ыджыд нянь шӧрӧм, кисьтіс кринчаысь сулея тыр йӧв да мӧдӧдчис фермаӧ. Лэччигмозыс борйысь нетшкис моздор тырыс бобӧнянь.

Милочка куйліс кос идзас вылын картабердса йӧрын. Нывка вель дыр малаліс-шыльӧдіс сійӧс. Милочка весиг юрсӧ эз лэптыштлы, синъясыс гудырӧсь, омӧльтчӧма. Галя мыччис куканьлы выя нянь, мӧдыс весиг эз исышт.

— Ме ӧд тӧда, любитан тэ выя няньтӧ. Мыйла нӧ он сёй? Тадзнад дзикӧдз омӧльтчан. Гашкӧ, бобӧняньсӧ видлан?

Милочка исыштіс чӧскыд кӧра турунсӧ, но вомас эз босьт.

Кытыськӧ нем виччысьтӧг кукань вылӧ уськӧдчисны лӧдзьяс. Ӧвтыштас нывка чышъяннас, пышйыласны и здук мысти бара нин пуксялӧны, дӧзмӧдӧны висьысьӧс. Галя котӧртліс карта пытшкӧ, аддзис мамыслысь важ плащсӧ, вевттис Милочкаӧс.

Рытӧдзыс бергаліс Галя висьысь дорын. Кымыныськӧ кевмысис, медым йӧвсӧ кӧть юас, но Милочка эз кывзысь. Шог лои нывкалы, нинӧмӧн оз вермы отсавны куканьлы. Кыдз нӧ, эськӧ, кӧть неуна вердыштны? Босьтіс йӧв тыра сулеясӧ, паськӧдыштіс кияснас куканьлысь вомсӧ и ичӧтикаӧн пондіс кисьтыштавны йӧвсӧ. Милочка тюп-тяпкерис вомнас: горшыс, тыдалӧ, ёна косьмӧма.

Юыштіс йӧвсӧ.

— Айда тэ, дженьыд сюр. Сёйны кӧ кутан — бурдан, — нывкалы зэв любӧ лои.

Сэсся кукань нямлялыштіс и китыр бобӧнянь. Галя кутлӧ сійӧс сьылі гӧгӧрыс, малалӧ небыд гӧнсӧ.

Локтіс мамыс, куканьясӧс вайӧдіс. Ёна и ошкис Галяӧс.

Та бӧрын нывка быдса вежон чӧж на бергаліс да вердіс-юкталіс висьысь куканьӧс. Нянь да йӧв сылы гортсьыс ваяс, медчӧскыд турунсӧ новлас. Весиг кор нин Милочка сувтіс кок йылас, Галя пыр сы дінын бергаліс. Милочка водас шойччыны, нывка сы дінӧ пуксьӧ. Кукань видзӧдӧ сы вылӧ аслас ыджыд синъясӧн да быттьӧ кӧсйӧ шуны: «Аттьӧ, бур нылӧй. Кок йылӧ менӧ бӧр сувтӧдін».

Кыдзкӧ ӧтчыд Галя лэдзис йӧрысь куканьсӧ. Рытъявылӧдзыс йирӧдіс веж луд вылын. Фермаӧ бӧрсӧ локтігӧн на вылӧ виччысьтӧг вувзьысис сиктысь медся лёк понйыс, Султан. Щӧтьсӧ лэптӧма, эралӧ. Галя ёна повзис, заводитліс пышйыны. Но пон здукӧн суӧдіс, вот-вот курччас, косявлас платтьӧсӧ. Нывка тэрыба кайис потшӧс вылӧ, кутіс бӧрдны. Милочкалы, тыдалӧ, жаль лоис аслас ичӧтик кӧзяйкаыс, лэдзис юрсӧ увлань, дженьыдик сюръяссӧ веськӧдіс лёк пон вылӧ. Султан, буракӧ, тайӧс эз виччысь, чепӧсйис бӧрвыв. Милочка сы бӧрся. И вель ылӧдз вӧтчыліс. Сэсся бӧр бергӧдчис повзьӧм нывка дінӧ, нюлыштіс сылысь кӧмтӧм коксӧ, гожъялӧм сойсӧ.

— Аттьӧ тэныд, Милочка. Не тэ кӧ, пурис менӧ лёк Султаныд. — И нывка меліа сывйыштіс куканьӧс голяӧдыс.