АС МУЛӦН СЕРПАСТОР


Художник рисуйтіс ас мулысь серпастор
Альбомысь нетшыштӧм ки пасьта ватман вылӧ.
Сэн нӧрыс йылын тӧвкӧд еджыд кыдз пу сьылӧ,
Вӧр море паськалӧ да бузгӧ эзысь шор.

Ог аддзы мортӧс сэсь, но кыр йылын кык кӧр.
Юр лэптӧм ӧтикыс, а мӧдыс мыйкӧ йирӧ.
Ю весьтті дзӧвйӧ кутш да видзӧдӧ ю йирӧ,
Сэн дзебас сайын кӧнкӧ сьӧмга оз-ӧ вӧр.

А юыс сэтшӧм сӧдз! Тэ пыдӧссьыс кӧть мед
Пыр лыддьы изъяссӧ, оз мешайт нинӧм тэд.
И сэні купайтчӧ яр шондіа лӧз енэж.

Художник рисуйтіс ас мулысь серпастор.
Ме сійӧс новлӧдла ас сьӧрысь, кӧть мед кор,
И йӧзын гажтӧмлунӧс сьӧлӧм менам венӧ!

1962 во.