АПРЕЛЬ 12-ӧд ЛУНСюрс ӧкмыссё квайтымын ӧтикӧд во, Апрельлӧн дас кыкӧд лун! Да, Му вылын коляс зэв уна сюрс во, Но луныс жӧ тайӧ оз вун. Оз вун Апрельлӧн дас кыкӧд лун! Сё нэмъяс чӧж енэжӧ видзӧдіс морт Да корсис сэк вына борд, Мед венны Му кыскӧм да аддзыны эрд, Кӧн кодзувлӧн туй оз берд. Выль эрд, Кӧн кодзувлӧн туй оз берд. Зэв горзісны Рытылын; аддзам пӧ ми, — Ӧд миянкӧд пӧ тӧлк и вын. И Марс вылӧ катам пӧ капитализм, И киясысь вермӧм оз мын. Оз мын, — Ми сейфын пӧ зарни вын! Но «Атлас» эз кач ни «Поларис» эз кай, Кӧть пессисны уна ног. А сывъяліс космослысь «ад» и «рай» Сӧветскӧй корабль «Восток». Да, ёрт, Сӧветскӧй корабль «Восток»! И пукаліс сэн эз Рокфеллерлӧн пи, Код нимавны вывті горш, А пукаліс прӧстӧй колхозник пи И кодзувъяс пӧвстӧ эз вош. Эз вош, Кӧть оз на и новлы тош. Сідз войтырӧс быдтіс тан партия-мам, Бур компас тшӧтш сетіс: «Босьт». И Юрий Гагаринлӧн тырмис бур сям Му кыскӧмкӧд нуны кось. Зэв ёсь, Но венӧма ыджыд кось! И космосса первой Колумблы мир Быд пельӧсын шлопӧдӧ ки. И слава отчизналы сьылӧ эфир, И славасӧ морт оз ви. Оз ви, — Туй космосӧ восьтім ми! Сюрс ӧкмыссё квайтымын ӧтикӧд во, Апрельлӧн дас кыкӧд лун. Да, Му вылын коляс зэв уна сюрс во, Но луныс жӧ тайӧ оз вун. Оз вун Му кыскӧмӧс венан лун! 1961 во.
