ТЭ МЕНАМ — КОК УВ МУ


1
Бара, бара чужан сиктӧ вои,
Видза олан, менам Ыджыдвидз!
Бара воӧн верстьӧджык ме лои,
Он тай кадтӧ сувтӧд, кут да видз.

Тэ жӧ, видзӧда да, быд во томман,
Выльмӧмыд да мичмӧмыд, эг тӧд.
Чужан муӧй — челядь дыр и томлун,
Му вылас тай тэ кодь абу мӧд.

2
Ылын гортсянь олігад
Ас му кык пӧв дона.
Гежӧдика волігад
Гажыд бырӧ ёна.

Висер юӧй, сӧстӧмӧй.
Юктав чӧскыд ванад.
Лы кодь керйысь тшупӧма,
Гортӧй, лунӧ бана.

Медым керка пытшкас кӧ
Абу мужик мортыс, —
Бур йӧзыс тай вӧчисны
Менсьым шоныд гортӧс.

3
Батьлысь керкасӧ косялім, важсӧ,
Сійӧс выльмӧдысь мортыс эз лок.
Нуис сэтысь и медбӧръя гажсӧ
Медся донаыс, дзик ӧти вок.

Йиа ва вылын кынмӧмысь нэрмис,
Босьтіс висьӧмыс, сьӧкыд да кузь.
Бӧръя часӧдзыс шмонитны вермис,
Писькӧс вежӧра вӧлі да сюсь.

Тӧдӧ, кулас, а велӧдӧ овны:
— Ыджыд туй вылӧ, чоюкӧй, пет,
Паськыдінъясысь нинӧмла повны.
Йӧзлы ме пыдди бурсӧ тшӧтш сет...

4
Быдмывлі ме зонпоснияс пиын.
Нывкаяс моз аканьӧн эг ворс.
Гожӧмбыд ме вугыр шатьӧн киын
Кыйлі Висер юысь чери-ёс.
Ме ӧд кӧсйи зон кодьӧн жӧ лоны.
Лолыштлытӧг варччывлывлі ю.
Кужлі изйӧн медся ылӧ воны.
Косясьлі тшӧтш, мый кӧть сэсся шу.
Некор зэптӧ ме эг пырав кывла.
Косьтӧм лыс моз ӧзйывлі ме дзаж.
Лэбач моз жӧ радейтлі ме ывла,
Сійӧ вӧлі меным шуд и гаж.

5
Луныс выйӧн войталӧ,
Ольын куртам турун.
Тшӧтш и челядь войтырлӧн
Киясаныс куран.
Турун юрсьыс мукӧдыс
Абу весиг джуджыд.
Он тай няргы ӧвадысь:
Ыззьӧдӧма уджыд.

6
Уна пӧлӧс йӧзӧс нин ме тӧдлі,
Паныдасьліс мортыс лёк и бур;
Кыпавлі бур кывйысь, лӧжсьыс пӧдлі,
Сӧмын некод мамыд кодь оз сюр.
Ой тэ, мамӧй, менам муса мамӧй,
Карысь воа, кильчӧ вылын пыр.
Сьӧлӧмыд мӧй кылӧ, петан паныд?
Некор тэнад муслуныд оз быр.

7
Быдӧнлы моз бордъясьны
Воис кад и меным.
Лэбзям тай ми гортъясысь.
Кӧть и лӧсьыд сэні.
Ӧні быттьӧ мамӧлысь
Кыла мелі сёрни:
— Мортӧн лоан, велӧдчы,
Жаль, мый меным сёр нин.
Ёнасӧ эн гажтӧмчы,
Вежӧраӧн лоан.
Чужан сиктӧ велӧдны
Коркӧ ачыд воан.

8
Карыс уна бурсӧ меным сетіс,
Кыпӧдіс да сӧстӧммӧдіс лов.
Сэн и первой сьылан менам петіс,
Сэн и чужис медводдза любов.

Но ас сиктӧ важ моз менӧ кыскис,
И со бара менам шуда лун.
Чужан сиктӧ телеграмма ысті:
«Гортӧ локта, бокӧ ме ог мун».

Бара аслам чужан Ыджыдвиддзын,
Кӧні тӧдса мем быд ёль и рас.
Бара орччӧн мӧдлапӧвса видзным,
Гулыд ягыс помтӧг муса, ас.

Мыйкӧ бурӧс вашкӧдӧ мем пельӧ
Школадорса льӧм пу, важся ёрт.
Бара орччӧн дона, сиктса челядь,
Сӧмын налы ме нин — ыджыд морт.

9
Муслун сьӧлӧмысь оз быр,
Пырӧма нин вирӧ.
Сьывны кӧсъя ёнджык пыр.
Ломзьӧдны би чирӧс,
Сьыланкывйӧн, сиктӧй, тэд
Кӧсъя сьӧлӧм восьтны.
Чусала на, ӧзйи мед,
Колӧ тӧв ныр босьтны.
Велӧдысьтӧг и кузнеч
Омӧлика дорччӧн.
А мед кыптас сьыланкыв,
Сьылысьяс мед орччӧн.

10
Мусюр вӧлӧк, кымынысь ме таті
Арся няйтсӧ кос шӧрӧдз эг уй,
Ытва дырйи Висер юӧд катлі,
Гортланьыд тай дженьыдджык век туй.
Карса олысьӧн эг кӧсйыв лоны,
Он тай водзвыв олан туйтӧ тӧд:
Мый на вермас сьӧлӧм вылад воны,
Ӧні думъясӧй со дзик нин мӧд.
Гортад, эськӧ, мамыд дорын овны,
Комиӧн кӧ шуны, мус оз зырт.
Ӧти шоныд позйыд эз кут ковны.
Куш ӧд сійӧн сьӧлӧмтӧ он тырт.

11
Эн шогсьы, чужан сиктӧй,
Оз йитӧд миян ор.
Тэ ӧдзӧсъяс эн сипты,
Эн игнась, менӧ кор.
И тэ дорӧ ме вонас
Ог ӧтчыдысь на во.
Мем карыс тшӧтш жӧ дона,
Эн вежӧгты тэ, но?
Ог уськӧд тэнсьыд донтӧ
Ме тайӧн, мый кӧть шу.
Мем карыс — юр весьт шонді,
Тэ менам — кок ув му.