СТЁПА


Пӧрысь дядьӧ чой паныд вадорсянь кыскӧ даддьӧн ва тыра пельса. Чойыс крут. Морт пельпом вомӧныс шыбитӧма кӧв пыддиыс кӧрталӧм гез пом да, мыджсьӧмысла джынвыйӧ кусыньтчӧмӧн, сьӧкыда кыскӧ дадьсӧ.

Мир туй кузя мунӧны кык детинка.

— Стёпа, вай отсалам дедӧыслы, — шуис ӧтиыс.

— Ме ог, Ваня! — пыркнитчис Стёпа.

— Чой паныдсӧ катӧдны кӧть отсыштам, — эз лэдзчысь Ваня.

— Кута тай ме... — дӧзмис Стёпа.

Ваня котӧртіс чой ньылыд да кутчысис дадь кӧвйӧ. Степанлӧн серамыс петіс: другыс зэв нин кусыньтчӧмӧн кыскӧ дадьсӧ, кӧнкӧ, став эбӧссьыс зільӧ. Кыкнад ӧдйӧ воисны чой йылӧ, сувтовкерисны.

— Пасибӧ, пиӧ, — шуис дядьӧ, пӧрччис шапкасӧ, лысӧм юрсьыс пальто соснас чышкис пӧсьсӧ да видзӧдліс эз отсасьысь вылӧ, а Стёпа вылӧ.

— Дедушка, ме тэныд отсала ватӧ гортӧдзыд нуны, — вӧзйысис Ваня.

Южмӧм туй кузя кыкӧн кокниа нин кыскисны ва пельсасӧ. Стёпалы быттьӧ эз ло лӧсьыд, но вӧтчыны эз кут, руньгис гортас.

Гашкӧ, эськӧ ставыс тайӧн и помасис, эз кӧ чукӧртны тӧвнас школаын пионеръяслысь слёт. Пӧрысь йӧз пӧ сэні кутасны висьтавлыны асланыс олӧм йылысь. Стёпа, дерт, тшӧтш локтіс слёт вылӧ. Интереснӧ кывзыны, мый висьталасны олӧма йӧз: налӧн ӧд олӧмыс озыр.

Пионервожатӧй сетіс кыв Григорий Дмитриевич Кочановлы. «Коді бара Кочановыс?» — мӧвпыштіс Стёпа да мукӧдъяс моз жӧ гӧгӧр дзоръяліс.

Пызан дорӧ зумыд воськовъясӧн локтіс пӧрысь дядьӧ. Пинджак морӧс вылас ӧшалӧны орденъяс, читкыртыштӧм синъясыс нюмъялӧны. Стёпа пыр и тӧдіс сійӧ дедсӧ, кодлы Ваня отсаліс кыскыны дадьсӧ. Детинка яндзимысла эз тӧд, кытчӧ воштысьны, юрсӧ лэдзис увлань, но и сэки кажитчис сылы, мый дедлӧн читкыртыштӧм синъясыс видзӧдӧны сӧмын сы вылӧ.

Тӧдіс эз Григорий Дмитриевич Стёпаӧс — сьӧкыд шуны. Сійӧ пионеръяслы висьталіс, кыдзи воюйтлӧма Великӧй Отечественнӧй война фронтъяс вылын. Сёрнитіс ышнясьтӧг, а мыйта вӧлӧма героизмыс сылӧн да сы кодь жӧ уна мукӧд сӧветскӧй воинъяслӧн фашистъяслы паныд тышын. Пионеръяс лов шысӧ кутӧмӧн кывзісны вӧвлӧм майорлысь висьталӧмсӧ. Стёпа зілис жӧ кывзыны, но син водзас ӧтарӧ локтіс пӧрысь мортлӧн даддьӧн чой паныд ва пельса кыскӧмыс, Ванялӧн сылы отсасьӧмыс да аслас шутьлялігтыр гортӧ мунӧмыс.

Слёт помасьӧм бӧрын пӧрысь воин муніс пионеръяслӧн топыд кытшын гажаа варовитігтыр. Стёпа сэні жӧ вӧлі. Сӧмын эз лысьт петкӧдчыны дед син улӧ: сылы вӧлі зэв яндзим коркӧясьыс.


Гижысь: 
Гижӧд
Стёпа
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1