ОТПУСКЫН


Отпускын ме гижны кӧсйи,
Мен июль редактор вӧзйис.
Майбыр жӧ нин, гажа кад,
Вои сиктӧ, аслым рад.

Садьми, асыв аттӧ мича.
Шуа: «Чужан сиктӧй, видза!
Тэча тэныд сьыланкыв,
Ошка вӧр-ва, ывла выв».

Мамӧ шуӧ: «Но, сё морӧ,
Кутшӧм гижӧм, град йӧр корӧ.
Ог жӧ пӧрысь морт ме пет.
Мудйысьны, дерт, ковмас тэд».

Вежон ёг турунӧн дури,
Килы, кослы мудзыс сюри.
Эштіс сэсся, слава бог,
Гижны пукся, быри шог.

Мамӧ бара: «Морӧн лыйӧм,
Талун-аски уджыс выйим.
Ачыс корӧсьыд оз во,
Йӧзыс ваялӧны со!»

Бара доддялісны менӧ,
Гӧстя мортыд он пыр венӧ.
Лун-мӧд верді лӧдз да ном,
Ӧні, думайта нин, пом.

Сӧмын гортӧ корӧсь воис,
Петны видз вылӧ тай лоис.
Ытшки-курті дас вит лун,
Пӧттӧдз эз и шедлы ун.

Татшӧм отпуск менам вӧлі.
Мӧд во сійӧс босьта тӧлын.
Сӧмын ловъя вӧлі мед.
Пукта кырымпас: поэт.