НЁБДІНСА ВИТТОРЛЫ

«...Гашкӧ нӧ, мӧдысьджык
«Аттьӧ» на миянлы
Кодъяскӧ шуасны».
В. Савин.

Кор чужи ме,
Тэ вӧльнӧй светас эн нин вӧв.
И Коми муӧ
Тэтӧг пуксис нёльӧд тӧв.
Победа йылысь сьыліс мездмӧм Сӧвет му
И тайӧ шуда лунсӧ, Виттор,
Эн нин су.

Чужанінад, Трӧш сиктад,
Кӧні вӧр пуыс вашкӧ,
Сюзь Матвейтӧ моз ловйӧн
Тэнӧ лыддисны, гашкӧ.

Тэ кодь морт йывсьыс шулӧны,
Гортйысь пӧ чеччас.
Петлӧ сӧрнытӧ, войтыр.
Он нин, кулӧмыд, чепсась.

Он нин кыпавлы ловнад,
Муслун сьӧлӧмад видзиг.
Он нин шонділысь петӧм,
Югыд кодзувъяс видзӧд.

Сӧмын паметяс йӧзыслы
Мыйӧнкӧ колян.
Бӧрас сетасны дон,
Вӧлін ыджыд-ӧ, дзоля.

Гӧрд эжӧда книгатӧ листала бара,
И унаысь петлывлӧ нюм.
Скӧр Латкиныд воӧма со Сыктывкарӧ,
И войтырлӧн вошӧма ун.

Со вензян нин быттьӧкӧ вемӧсӧн, збыльысь
И доръян Сӧветъяслысь власть.
Италия му вылын Май праздник йылысь
Тэ повтӧма висьтавны дась.

А думъясыд гартчӧны, йирӧны тэнӧ:
Зіль уджалысь войтырыс жаль.
Ӧд гӧльлуныс, пемыдыс найӧс на венӧ,
Мед эськӧ эз дзикӧдз жӧ таль.

Тэ велӧдны, югдӧдны чуксалан найӧс,
И бара со вӧлӧкыс кузь.
Ас гижӧм спектакль сиктса войтырлы ваян,
А кымын вой гижин, эн узь?

И ворсысьыс ачыд, и сьылысьыс ачыд,
И сьыланкыв тэнад дзик ас.
А тайӧ нӧ ловсӧ кыдз йӧзлысь оз качӧд,
Да на пӧвстӧ оз коль бур пас?

Эжва дорӧ дзебны тшӧктін,
Мед видз вывсьыс дзоридз ӧктіг,
Бурлак зонъяс, мича нывъяс
Ливкйӧдлісны сьыланкывъяс.

Юлысь шлывгӧмсӧ мед кылін,
«Сьӧлӧм сьылӧмтӧ» мед сьылім,
Тайӧс, Виттор, коркӧ кӧсйин;
Бурсиӧмъяс ставлы вӧзйин.

Гажа Эжва нӧрысын
Абу тэнад гу.
«Югыдін да шоныдін»
Эз сет Коми му.

Оз тай, кыдзи кӧсйылам,
Ставыс сідзи ло.
Ловъя юрӧн Комиӧ
Эн нин сэсся во.

Олӧм гыыс кыпӧдіс,
Швачкӧбтіс — и пом.
Ачыд колин йӧз пӧвстӧ,
Серамбана, том.

Парма весьтын лэбалӧ
Инасьлытӧм лов.
Виктор Алексеевич,
Ставыс бур, эн пов.

Сюзь Матвейыд ловъя на,
Парма чуркйын тан.
Важ мозыс на гажӧдӧ,
Сьылӧ «Шондібан».

Югыд кодзув петас на,
Петас мича ныв.
Чужӧны выль сьылысьяс,
Шаньмӧ коми кыв.

Тэнад пессьӧм-вийсьӧмыд
Весьшӧрӧ эз вош.
Варыш пиян быдмисны,
Лэбӧм налӧн чож.

Сьылам «Сьӧлӧм сьылӧмтӧ»,
Пасъям чужан лун.
Коми муын сьӧлӧмыд,
Лолыд тась эз мун.

Аслад мыла сьылӧмнад
Миянкӧд, поэт.
Аттьӧ, коми колипӧй,
Муӧдз копыр тэд!