* * *

Ме ассьым сьӧлӧм коли бипур дорӧ,
Код паськӧдыштӧ войлысь пемыдін,
Став вошӧм ловсӧ сійӧ кыскӧ-корӧ,
И менам сьӧлӧм аддзис сэтысь ин.
Ме ассьым сьӧлӧм сеті шӧпкысь тӧвлы,
Код вашкӧдіс мен мыйкӧ мелітор.
Ме шуи сылы: «Виччысьлы вай, чӧвлы».
Но лэбис сійӧ, быттьӧ арся кор.
Ме лэдзи ассьым сьӧлӧм руньгысь юас,
Мед аддзас сэтысь дой кылӧдысь поз.
Мед тувсов ю моз сьӧлӧм ойдас-туас,
Мед ыдждас-чинас тувсов ытва моз.
Став сьӧлӧм-мӧвпӧс вӧр-ваыслы сеті,
И ставыс лои муса, ставыс ас.
Кӧн менам лов — сэсь ачым чужи-петі,
Кӧн менам лов, сэн муслунӧйлӧн пас...