* * *

Асъя кыакӧд садьма кор водз,
Менӧ кыскӧ нин ывлаӧ сьӧлӧм.
Паныд воысьыс овлӧ на шоч,
Карса уличьяс тыртӧмӧсь, чӧлӧсь.

Миян кар весьтӧ пуксьӧ выль лун,
Ӧшинь-синъясын енэжыс ворсӧ.
Карса войтырлӧн палялӧ ун,
Асъя ывлаыс шызьӧ да горзьӧ.

Менам сьӧлӧмӧй радлунӧн тыр,
Ӧти тӧждӧн ми карыскӧд олам.
Сійӧ кыптӧ да мичаммӧ пыр,
А зіль войтырыс тан кыпыд лола.

Кузь нэм тіянлы сиа, бур йӧз,
Ӧта-мӧднытӧ сьӧлӧмнад кылӧй.
Сыктывкар весьтын енэжыс лӧз,
Качӧ сьыланкыв сыланьӧ, вылӧ.